ملت ته د حکومت حساب ورکول؛ د تخنیکي او مسلکي زده کړو ادارې خپلې یو کلنې لاسته راوړنې وړاندې کړې

د تخنیکي او مسلکي زده کړو ادارې مشرتابۀ پلاوي د حکومت د اطلاعاتو او رسنیو په مرکز کې ملت ته د حکومت حساب ورکونې په برنامه کې د دغې ادارې د یو کال لاسته راوړنو راپور وړاندې کړ.

د دغۀ پروګرام په پيل کې د تخنيکي او مسلکي زده کړو ادارې سرپرست مولوي غلام حيدر شهامت د دغې ادارې د اهميت په اړه خبرې وکړې.

نوموړي وويل:  د پوهنې او لوړو زده کړو وزارتونو ترڅنګ د تخنيکي او مسلکي زده کړو اداره د ځوانانو او د ټولنې د ځانګړو طبقو د زده کړو دنده پر غاړه لري.

ښاغلي شهامت ټینګار وکړ چې دا مهال د تخنیکي او مسلکي زده کړو اداره یوازینۍ اداره ده چې د تخنیکي او مسلکي ځواک په روزلو بوخته ده.

هغه زیاته کړه:  د ټکنالوژۍ په پرمختګ او د خلکو د ژوند له بدلون سره د کار بازار هم بدل شوی او د تخنیکي او مسلکي زده کړو اداره د کار بازار له اړتیا سره سم ځواک روزې.

ښاغلي شهامت وویل: د اشغال له پای ته رسیدو وروسته اوس هیواد په ټولو برخو کې حرفوي ځواک ته په کلکه اړتیا لري او د دې اړتیا پوره کول د تخنیکي او مسلکي زده کړو ادارې مکلفیت او دنده ده.

د تخنيکي او مسلکي زده کړو ادارې سرپرست په تېر کال کې د دغې ادارې سترو لاسته راوړنو ته اشاره وکړه او ويې ويل: د نابینایانو لپاره په بريل خط د قرانکريم چاپ يوه له هغو لاسته راوړنو څخه ده چې يادې ادارې په لومړي ځل ترلاسه کړې.

د تخنیکي او مسلکي زده کړو ادارې د تقنیني اسنادو تدوین یا بیاکتنه د ا.ا.ا له پالیسۍ سره سم د اختراع کونکو د ملاتړ لپاره د نوښت مرکز رامنځته کول، د پنځه کلنې ستراتیژۍ پراختیا، د برښنایي سیسټمونو رامنځته کول، د ریل پټلۍ څانګه او د هغې ښوونیز نصاب جوړول، د ګرځندوی او هوټلدارۍ انسټیټوټ جوړول او له آلمان څخه افغانستان ته د تخنیکي او مسلکي څانګو د لیږدولو په موخه د " stay in Afghanistan" مؤسسه سره هوکړه د تخنیکي او مسلکي زده کړو ادارې د تیر کال له نورو لاسته راوړنو څخه دي.

همدارنګه د ښاغلي شهامت په وینا؛ په پوهنتونونو کې د جذب لپاره د تخنیکي او مسلکي زده کړو د مرکزونو د فارغانو لپاره د یو کلن تنزیل لرې کول، د یو نمونیې او معیاري انسټیټوټ په جوړولو کار کول، د تخنیکي او مسلکي زده کړو مرکزونو د سروې لپاره د بیاکتنې د ګډې برنامې پلي کول، د اسلامي امارت د مجاهدینو لپاره د ظرفيت لوړونې کورسونو جوړول، د تخنيکي او مسلکي زده کړو ادارې د تير کال له لاسته راوړنو څخه دي .

د برنامې په دوام کې د تخنیکي او مسلکي زده کړو ادارې مالي او اداري چارو مرستیال مفتي فضل الرحمن فاضل د دغې ادارې  مالي او اداري برخې راپور وړاندې کړ.

ښاغلي فاضل وویل: د تخنیکي او مسلکي زده کړو اداره توانېدلې چې په تېر کال کې خپلې ۵۰ ودانیزې پروژې د بیا ځل لپاره اټکل شوې او نیمګړې پروژې بشپړې کړي.

نوموړي زياته کړه: د تخنيکي او مسلکي زده کړو د مرکزونو يو شمېر ودانۍ چې ترميم ته اړتيا وه ترميم شوې دي.

دغه راز د تخنيکي او مسلکي زده کړو اداره د پيسو د سپما او د موټرو د تېلو د ضايع کېدو د مخنيوي په موخه د دغې ادارې په انګړ کې د تېلو ټانک جوړ کړی دی.

ښاغلي فاضل وویل: د املاکو په برخه کې د تخنیکي او مسلکي زده کړو اداره توانېدلې چې خپل ټول ملکیتونه له دولتي املاکو بانک سره ثبت کړي.

د تخنيکي او مسلکي زده کړو ادارې مالي او اداري چارو مرستيال زياته کړه چې د دغې ادارې يو شمېر تصاحب او غصب شوي ملکیتونه هم څېړل شوي او د استرداد لپاره یې اسناد عدلي او قضايي ارګانونو ته استول شوي دي.

نوموړي د بودجې په برخه کې وويل:  د تخنيکي او مسلکي زده کړو اداره توانېدلی چې په ۱۴۰۱ مالي کال کې له خپلې عادي او پراختيايي بودجې شا او خوا يو نيم ميليارد افغانۍ په اغېزمنه توګه مصرف کړي.

په همدې موخه د تخنيکي او مسلکي چارو مرستيال مولوي غلام سعيد احساس، په اکاډمیکه برخه کې د تخنيکي او مسلکي زده کړو ادارې د فعاليتونو او لاسته راوړنو په اړه خبرې وکړې.

هغه وويل: د تخنيکي او مسلکي زده کړو اداره په تېر کال کې خپل نصاب ته په کلکه پاملرنه کړې او په دې توانېدلې چې د تخنيکي او مسلکي زده کړو د مرکزونو تحصيلي څانکې نوې کړي.

ښاغلي احساس زیاته کړه؛ پخوا بۀ د تخنیکي او مسلکي زده کړو په مرکزونو کې داسې څانګې تدریس کېدلې چې بلکل اړتیا نه وه ورته.

نومړي زياته کړه:  د تخنيکي او مسلکي زده کړو په څانګو کې د بيا کتنې له لارې داسې نويې څانګې رامنځته شوې چې هغو ته د هېواد اړتيا ده.

ښاغلي احساس د کرنې په څانګو کې بیا کتنې ته په اشارې سره وویل: افغانستان یو کرنیز هېواد دی ځکه خو د کرنې په برخه کې مسلکي کسانو ته کلکه اړتیا لري.

هغۀ وويل: د تخنيکي او مسلکي زده کړو ادارې د خپلو برښنايي څانګو پر بیاکتنې هم کار کړى او کارونه يې ٨٠ سلنه پرمخ تللي دي.

همدارنګه ښاغلي احساس زیاته کړه چې د نۀ لیدونکو او نۀ آورېدونکو وروڼو لپاره د ځانګړو زده کړو په برخه کې سوداګریزې او دیني څانګې  جوړې شوې دي.

نوموړي د خپلو خبرو په دوام کې وویل: د تخنیکي او مسلکي زده کړو د مرکزونو له هغو امکاناتو او تجهیزاتو څخه (چې له کلونو راهیسې نه دي کارول شوي) د ګټورې استفادې په موخه یو تخنیکي ټیم ګمارلی چې یاد ټیم د تجهیزاتو او امکاناتو د بررسۍ په حال کې دی.

دغه راز د تخنيکي او مسلکي زده کړو چارو مرستيال د تخنيکي او مسلکي زده کړو ادارې د نوښت مرکز په هکله خبرې وکړې او ويې ويل: په تيرو وختونو کې نوښتګر سرګردان وو، خو اوس د دوی لپاره د همغږۍ او انسجام مرکز جوړ شوی دی.

ښاغلي احساس زیاته کړه: تر دې دمه د تخنیکي او مسلکي زده کړو ادارې د نوښت پۀ مرکز کې ۱۵۰ پروژې ثبت شوي دي.

هغه وويل: "هغه پروژې چې خلک ورته اړتيا لري، پر هغو باندې به کار وشي او بشپړې به شې."

نوموړي مرستیال دا هم وویل چې د تخنيکي او مسلکي زده کړو اداره پر هغه طرحه کار کوي چې روږدو ته د روږدو د درملنې په مرکزونو کې د تخنيکي او مسلکي زده کړو زمينه برابره کړي.

د ننني پروګرام په پای کې د تخنیکي او مسلکي زده کړو ادارې مشرتابۀ (ښاغلي شهامت) د خبریالانو پوښتنو ته ځوابونه وویل او برنامه پای ته ورسیده.