د ننگرهار ولایت د تخنیکي او مسلکي زده کړو آمریت او امیر علی شیر نوايي پوهنتون ترمنځ تفاهم لیک لاسلیک شو
د ننگرهار ولایت د تخنیکي او مسلکي زده کړو آمر مولوي محمد طاهر جلالي په یاد ولایت کې د امیر علي شیر نوایی پوهنتون له مسؤلینو سره د ګډو همکاریو تفاهم لیک لاسلیک کړ.
د یاد تفاهملیک پر بنسټ به د ننګرهار ولایت د تخنیکي او مسلکي زده کړو مرکزونو فارغان په ځانګړي تخفیف سره د زدهکړو د دوام په موخه د ننګرهار ولایت په امیر علي شیر نوايي پوهنتون کې شامل شي.
همداراز په یاد تفاهملیک کې راغلي چې امیر علی شیر نوايي پوهنتون او د ننګرهار د تخنیکي او مسلکي زده کړو آمریت به د دواړو ښوونیزو بنسټونو د کارکوونکو او استادانو لپاره د ظرفیت لوړونې ګډ پروګرامونه په لاره واچوي.
له بلې خوا د محصلینو لپاره د پرکتیکو دورو جوړول او د دواړو ښوونیزو مؤسسو له کتابتون او کمپیوټرلب څخه د نوموړو ګټه اخیستنه هم د دې تفاهم لیک له موادو څخه دي.
