د میدان وردګو ولایت جلګې کثیرالرشتوي انسټيټوټ لخوا د سیرت النبی ﷺ د ازموینې پایلې اعلان شوې
د میدان وردګو ولایت د تخنیکي او مسلکي زده کړو آمریت اړوند جلګې کثیرالرشتوي انسټيټوټ د سیرت النبي ﷺ سیالۍ چې د یاد تخنیکي مرکز لخوا په لاره اچول شوې وه، نن ورځ یې پایلې اعلان شوې.
د دې ازموینې د پایلو اعلان کیدو په مراسمو کې د میدان وردګو ولایت یو شمیر مقاماتو، متنفذینو، علماوو او همدارنګه د یاد ښوونیز مرکز مسؤلینو هم ګډون درلود.
ويناوالو په دې غونډه کې ټينګار وکړ چې ځوانان او زده کوونکي بايد په خپلو کارونو کې د رسول الله ﷺ له سيرت څخه د خپل ژوندانه د اساس په توګه کار واخلي.
دغه راز د یاد پروګرام په بله برخه کې د یادې سیالۍ ممتازو زده کوونکو ته جايزې او ډالۍ هم ورکړل شوې او غونډه په دعايې سره پای ته ورسېده.
