په سمنګانو کې د تخنیکي او مسلکي مرکزونو د وضعیت د څیړلو په دوام
د تخنیکي او مسلکي زده کړو ادارې سرپرست مولوي غلام حیدر شهامت د ولایتونو تخنیکي او مسلکي زده کړو مرکزونو د څېړنو په دوام کې؛ د سمنګانو په ولایت کې د فیروزنخچیر لېسې او حضرت سلطان مسلکي لېسې وضعیت بررسي کړ.
د تخنیکي او مسلکي زده کړو ادارې سرپرست د زده کوونکو سره د لیدلو پر مهال د هغوی ستونزې او اړتیاوې یې واورېدې.
همدارنګه ښاغلي شهامت په دغه ولایت کې د لنډ مهاله حرفوي کورسونو څخه هم لیدنه وکړه.
د مناسبې ښوونیزې ودانۍ نشتوالی، د لابراتوار او کمپیوټر لب نشتوالی د دغو مرکزونو له لویو ستونزو څخه بلل کیږي.
د تخنیکي او مسلکي زده کړو ادارې سرپرست د اړتیاوو د پوره کولو د ژمنې په ترڅ کې د سمنګان ولایت تخنیکي آمرینو ته د ځینو مسایلو په اړه لازمې لارښوونې وکړې.
د تخنیکي او مسلکي زده کړو د ادارې د پلاوي سفر نورو ولایتونو ته د تخنیکي او مسلکي زده کړو د مرکزونو د اړتیاوو د څیړلو او حل په موخه دوام لري.
نوموړي پلاوي تر دې مخکې په بغلان، کندز او تخار ولایتونو کې د تخنیکي او مسلکي زده کړو د مرکزونو وضعیت څیړلی دی.
