د کابل ولایت د تخنیکي او مسلکي زده کړو مرکزونو د آمرینو ته د ظرفیت لوړولو سیمینار ترسره شو
د تخنیکي او مسلکي زده کړو ادارې اړوند تضمین کیفیت ریاست د کابل ولایت د تخنیکي او مسلکي زده کړو مرکزونو د ۳۵ تنو آمرینو لپاره د مدیریتي او تخصصي وړتیاوو د پیاوړتیا په موخه یو روزنیز سیمینار جوړ کړ.
د دې روزنیز پروګرام په پیل کې، د یادې ادارې تخنیکي او مسلکي مرستیال مولوي غلام سعید احساس خپله پرانیستونکې وینا وکړه.
نوموړي په خپله وینا کې د مسؤلیت پذیرۍ پر اصل، د کار ژمنتیا او د ښوونیزو معیارونو پر پلي کولو ټینګار وکړ، او له آمرینو یې وغوښتل چې د معیارونو پلي کولو، د تدریس کیفیت ښه کولو او د خپلو اړوندو مرکزونو د ښه مدیریت کولو لپاره هڅه وکړي.
د پروګرام په دوام کې، د ظرفیت لوړولو اړوند بیلابیل موضوعات، لکه د تضمین کیفیت معیارونه او استندردونه د دې ادارې د ترینرانو لخوا د سیمینار په بڼه ګډونوالو ته وړاندې شول.
د دې سیمینار ګډونوالو، دیاد ښوونیز پروګرام د ترسره کیدو څخه خوښي څرګنده کړه، دا ډول ښوونیز سیمینارونه یې د مدیریتي ظرفیت لوړولو او د مرکزونو په کچه د کاري همغږۍ د انسجام لپاره خورا ګټورې او رغنده وبلل.
د تخنیکي او مسلکي زده کړو اداره ژمن ده چې د ظرفیت لوړولو پروګرامونو ته په دوامداره توګه په بیلابیلو مدیریتي او ښوونیزو کچو کې دوام ورکړي ترڅو د متخصص ځواک د روزنې او په هیواد کې د زده کړییز کیفیت لوړولو لپاره اغیزمن ګامونه پورته شي.
