د میدان وردګو ولایت د تخنیکی او مسلکي زده کړو مرکزونو له مسؤلینو سره د مولوي غلام سعید احساس لیدنه
ښاغلی مولوي غلام سعید احساس، د تخنیکی او مسلکي چارو معاون د تخنیکي او مسلکي زده کړو مرکزونو د څارلو لپاره د میدان وردګو ولایت ته سفر کړی دی.
نوموړي د خپل سفر په اوږدو کې د تخنیکي او مسلکي زده کړو له مسؤلینو او استادانو سره د اړتیاو او ستونزو د حل کولو په مناسبت ناسته ترسره کړه.
ښاغلي مولوي غلام سعید احساس په دغه ناسته کې وویل؛ د تخنیکي او مسلکي زده کړو د استادانو او کارکوونکو مسؤلیت د ځوانانو په زده کړو او تربیه کولو کې ارزښت لرونکی دی او دغه مکلفیت باید په اساسي توګه ترسره شي.
همدارنګه؛ دغه هیأت د میدان وردګو ولایت د تخنیکي او مسلکي زده کړو مرکزونو کارکوونکو ته یو پریزنتیشن وړاندې کړ، چې موخه یې په ښه توګه د کارونو ترسره کول و.
د تخنیکی او مسلکی چارو معاون په دغه لیدنه کې، د استادانو او کارکوونکو غوښتنو ته په رسېدلو سربېره هغوی ته په ځینو برخو کې لازمې لارښونې هم وکړې.
