د ملګرو ملتونو پلاوي د بامیان د تخنیکي او مسلکي زدهکړو له مسؤلینو سره وکتل
په افغانستان کې د ملګرو ملتونو د سرمنشي ځانګړي استازي او د پراختیایي چارو مرستیال برونو لمارکیس په مشرۍ د ملګرو ملتونو یوه پلاوي، د بامیان ولایت د تخنیکي او مسلکي زدهکړو له آمر، استاد شاهولي احمدي، سره لیدنه او خبرې وکړې.
په دې لیدنه کې په افغانستان کې د اوچا ادارې مشرې، آغلې امي مارټین، هم ګډون درلود.
په دې ناسته کې د تخنیکي او مسلکي زدهکړو د مرکزونو، په ځانګړې توګه د بامیان ولایت د ځانګړو زدهکړو لېسې د وضعیت او د زدهکوونکو د اړتیاوو په اړه بحث او د نظرونو تبادله وشوه. د ملګرو ملتونو پلاوي د ښوونیزو او بشري اړتیاوو د پوره کولو لپاره د خپلو همکاریو پر دوام ټینګار وکړ.
د لیدنې په دوام کې د بامیان ولایت د تخنیکي او مسلکي زدهکړو آمر له نړیوالو بنسټونو وغوښتل چې د بنسټیزو پروژو د بشپړولو، د ښوونیزو مرکزونو د ملاتړ، د تخنیکي او مسلکي زدهکړو د پراختیا، د برېښنا او ودانیزو څانګو د تجهیز او ځوانانو ته د کاري فرصتونو د برابرولو په برخو کې خپلې همکارۍ پراخې کړي.
همدارنګه اعلان وشو چې یاد پلاوی به د خپل سفر په دوام کې د بامیان ولایت د تخنیکي او مسلکي زدهکړو آمریت د پنجاب او ورس په ولسوالیو کې د اړوند پروژو او ښوونیزو مرکزونو، څخه هم لیدنه وکړي.
دواړو لورو په بېلابېلو ښوونیزو برخو کې د همکاریو پر لا پراختیا هم ټینګار او ژمنتیا څرګنده کړه.
