د فراه ولایت مقام د تخنیکي او مسلکي چارو مرستیال په حضور سره غونډه جوړه کړه
د تخنيکي او مسلکي چارو مرستيال مولوي غلام سعيد احساس د یوې غونډې په ترڅ کې دفراه ولايت له مقاماتو او مسوولينو سره وکتل .
په دې غونډه کې د فراه ولایت مرستیال والي هم حضور درلود.
په پیل کې ښاغلي مولوي احساس د تخنیکي او مسلکي زده کړو ادارې د موخو او پروګرامونو په اړه په مفصله توګه توضیحات وړاندې کړل.
نوموړي د مجاهدینو روزنیز پروګرام ته چې په ټول هیواد کې د تخنيکي او مسلکي زده کړو ادارې له خوا په لاره اچول شوی په اشارې سره وويل: "د مجاهدينو روزنيز پروګرام د هغو مجاهدینو لپاره يو ښه فرصت دى چې د اشغال پر مهال له زده کړو بې برخه پاتې دي."
ښاغلي مولوي احساس د فراه ولایت د تخنیکي او مسلکي زده کړو مرکزونو ستونزې او اړتیاوې هم د یاد ولایت له سیمه ییزو چارواکو سره شریکې کړې.
له بلې خوا د فراه ولايت مرستيال والي د تخنيکي او مسلکي زده کړو ادارې د پروګرامونو د ستاينې او قدرداني ترڅنګ زياته کړه چې « د فراه ولايت مقام او سيمه ييز مسوولين به ددې ولایت د تخنیکي او مسلکي زده کړو مرکزونو ستونزو او ننګونو ته د رسیدنې په برخه کې لازمي اقدامات وکړي. »
په دې غونډه کې په نورو اړوندو مسایلو هم خبرې وشوې او غونډه په دعایې سره پای ته ورسیده.
