بغلان ته د تخنیکي او مسلکي زده کړو ادارې د پلاوي سفر
د تخنيکي او مسلکي زده کړو ادارې د پلان او ستراتيژيکي همغږۍ رئيس مولوي نېک محمد نېکمل د يوه پلاوي په مشرۍ بغلان ولايت ته سفر کړی دی.
ښاغلي نیکمل د دغه سفر په ترڅ کې په بغلان کې د تخنیکي او مسلکي زده کړو له مرکزونو څخه لیدنه وکړه او د دغو مرکزونو ستونزې یې وڅېړلې.
نوموړي په بغلان کې د یاد ولایت له سیمه ییزو چارواکو او د مؤسساتو له استازو سره وکتل او خبرې اترې یې ورسره وکړي.
د تخنیکي او مسلکي زده کړو ادارې د پلان او ستراتیژیکې همغږۍ رئیس د بغلان له والي مولوي عبدالرحمن حقاني سره په دغه ولایت کې د تخنیکي او مسلکي زده کړو آمریت د ملکیتونو ستونزو په اړه خبرې وکړې او د دغه ستونزې د حل غوښتنه یې وکړه.
دبغلان والي د بغلان د تخنيکي او مسلکي زده کړو آمریت دکارونو ستاينه وکړه او ډاډ يې ورکړ چې د دغه آمریت ټولې ستونزې به حل کړي .
