د کندهار د تخنیکي او مسلکي زده کړو آمریت د ظرفیت لوړولو له پروګرام څخه ۱۴۰ تنه نوي ګمارل شوي کارکوونکي فارغ شول
د کندهار ولایت د ملکي او نظامي ادارو ۱۴۰ نوي ګمارل شوي کارکوونکي د یاد ولایت د تخنیکي او مسلکي زده کړو آمریت له روزنیزې دورې څخه فارغ شول.
دغه کارکوونکي په لویه کې د افغانستان د اسلامي امارت مجاهدین دي او په دغه روزنیزه دوره کې یې د کمپیوټر، انګلیسي ژبې، ادارې او مدیریت په برخه کې زده کړې کړي دي.
د دغو مجاهدینو د فراغت په مراسمو کې سیمه ییزو چارواکو او د پوهنتون استادانو هم حضور درلود.
په خپلو خبرو کي لومړی د کندهار پوهنتون رئيس مولوي اکرم شاه ارغستاني د علم په ارزښت خبري وکړې او فارغ شويو مجاهدينو ته یې په خطاب کې وويل چي دوی د ټولني سرمايه ده.
د کندهار ولايت د پوهنې رئيس مولوي فخرالدين نقشبندي د یاد ولايت د تخنيکي او مسلکي زده کړو آمریت وروستي فعاليتونه او لاسته راوړنې وستايل او د دغه آمریت د کارکوونکو د وړتيا لوړولو په موخه يې د پروګرامونو د دوام غوښتنه وکړه.
