د ولایتونو د نظارت غړو او مدیرانو ته د ظرفیت لوړولو پروګرام جوړ شو
د تخنیکي او مسلکي زده کړو ادارې، د ولایتونو د تعلیمي او تحصیلي نظارت غړو او مدیرانو ته د ظرفیت لوړولو پروګرام جوړ کړ.
دغه پروګرام نن ورځ د تخنیکي او مسلکي چارو د مرستیال، ښاغلي مولوي غلام سعید احساس په وینا سره پیل شو.
د نظارت غړو او مدیرانو ته د ظرفیت لوړولو پروګرارم شپږ ورځې ادامه لري، د دغه پروګرام موخه د نظارت غړو ته د تعلیمي او تحصیلي چارو د نظارت او ارزونې طریقې پېژندل بلل شوي دي.
په همدې حال کې د تخنیکي او مسلکي چارو مرستیال په دغه پروګرام کې د ولایتونو د نظارت دغړو په اهمیت ټینګار وکړ او زیاته یې کړه، چې هغوی باید په دقت او بشپړ شفافیت سره خپلې دندې ترسره کړي.
همدارنګه ښاغلی مولوي احساس د دغه پروګرام له ګډون کوونکو وغوښتل چې د بیت المال ساتنه وکړي. نوموړي په هېواد کې د پسرلي موسم رارسېدلو ته په اشارې سره وویل چې د سرسبزۍ او نیالګیو کېنولو په برخه کې باید ډېرې هلې ځلې وشي.
ددغه پروګرام په دوام کې مبشرآغا د تعلیمي او تحصیلي چارو عمومي رئیس د نظارت او ارزونې د غړو د دندو به اهمیت خبرې وکړې، او په ولایتونو کې د نظارتي مسؤلینو په زیاته پاملرنه ېې ټینګار وکړ.
له بل پلوه ښاغلي مولوي عبدلودود عمر د تحصیلي او تعلیمي چارو د نظارت او ارزونې رئیس د دغه پروګرام د موخو په هکله خبرې وکړې، او په دغه پروګرام کې یې له ګډون کوونکو وغوښتل چې د نظارت او ارزونې چارې باید په جرئت، شفافیت او دقت سره ترسره شي.
ښاغلي مولوي عمر زیاته کړه چې د ولایتونو د نظارت غړي باید د ولایتونو د تخنیکي آمریتونو ټولې چارې نظارت کړي، او د اجرائاتو د ترسره کولو له څرنګوالي باید مسؤلینو ته راپور ورکړي.
