د تخنیکي او مسلکي زده کړو ادارې اړوند په جغتو کثیرالرشتوي انسټیټوټ کې د لنډمهاله حرفوي پروګرامونو پیل
په میدان وردګو ولایت کې د تخنیکي او مسلکي زده کړو ادارې مسؤلین وایي چې د یاد ولایت په جغتو کثیرالرشتوي انسټیټوټ کې یې د موټرسایکل ترمیم لنډمهاله ښوونیز حرفوي پروګرام پیل کړی.
د یاد ولایت د تخنیکي او مسلکي زده کړو آمریت په وینا، په دې پروګرام کې ۶۰ تنه زدهکړیالان ګډون لري، چې د دریو میاشتو په موده کې به د موټرسایکل رغونې په اړه نظري او عملي روزنه ترلاسه کړي.
د دغه ښوونیز پروګرام د ترسره کیدو موخه په ټولنه کې د کاري فرصتونو رامنځته کول او د بېوزلۍ کمول ویل شوي دي.
دا په داسې حال کې ده چې لنډ مهاله حرفوي پروګرامونه د تخنیکي او مسلکي زده کړو ادارې له بنسټیزو پروګرامونو څخه ګڼل کېږي، چې تر دې مهاله سلګونه کسان له دغو پروګرامونو څخه فارغ شوي او د کار په بازار کې په عملي توګه پر دندو بوخت دي.
