د تخنيکي او مسلکي زده کړو ملي ادارې له خوا دوه ساختماني پروژې افتتاح شوې
د تخنيکي او مسلکي زده کړو ملي ادارې سرپرست الحاج مولوي غلام حيدر شهامت نورستان ولايت ته د خپل سفر په ترڅ کې د نورستان ولايت په وايګل او برګمټال ولسواليو کې د دوو ښوونيزو مرکزونو د بنسټ ډبره کېښوده.
په دې سفر کې د حکومت د رسنیو مرکز رئیس مولوي نعیم الحق حقاني په ګډون یو شمېر نورو مسولینو هم حضور درلود.
د تخنيکي او مسلکي زده کړو ملي ادارې سرپرست د يادو ښوونيزو مرکزونو د بنسټ ډبرې د ايښودلو په مراسمو کې وويل، چې د وايګل کثیرالرشتوي انسټيټوټ ودانۍ به په څلور جريبه ځمکه او ١٤ درسي ټولګيو کې جوړه شي.
نوموړي همدا راز زياته کړه، چې د برګمټال کرنې مسلکي لېسه به په څلور جريبه ځمکه کې اته درسي ټولګي ولري.
د يادو دوه تدريسي ودانيو ټول لګښت ١٤ ميليونه ٩٠٠ زره افغانۍ دى، چې د ځايي سوداګرو او خلکو له خوا ورکول کېږي.
په دې خپرونه کې مولوي شهامت د نورستان ولایت د خلکو د سرښندنو او قربانیو یادونه وکړه او له حکومت سره یې د خلکو د همکارۍ له امله مننه او قدرداني وکړه.
