دتخنیکي او مسلکي زده کړو ادارې سرپرست د ترکمنستان د پوهنې وزارت له چارواکو سره خبري اترې وکړي
د تخنيکي او مسلکي زده کړو ادارې سرپرست ښاغلی مولوي غلام حيدر شهامت د دوست هېواد ترکمنستان د پوهنې وزارت له چارواکو سره انلاین ناسته وکړه.
په دې کتنه کې چې د تخنيکي او مسلکي چارو مرستيال مولوي غلام سعيد احساس هم حضور درلود، د ترکمنستان له خوا د تحصيلي بورسونو د ورکړې، په افغانستان کې د تخنيکي او مسلکي زده کړو د مرکزونو د استادانو لپاره د ریل پټلۍ او ګازو د نل ليکې په څانګو د روزنې او د ذکر شویو څانګو د نصاب د تدوين په باب خبرې وشوې.
ښاغلي شهامت د افغانستان او ترکمنستان د همکاریو له امله مننه وکړه او د تخنیکي او مسلکي زده کړو ادارې د فعالیتونو په اړه یې خبرې وکړې.
د تخنيکي او مسلکي زده کړو ادارې سرپرست دغه راز د رېل پټلۍ او ګازو د نل ليکې د انسټیټوټ د جوړولو په برخه کې له افغانستان سره د ترکمنستان د ښوونيز سکټور د همکارۍ غوښتنه وکړه.
د تخنيکي او مسلکي چارو مرستيال مولوي غلام سعيد احساس هم وويل، چې افغانستان له څلوېښت کلنې جګړې وروسته اوس د پرمختګ لپاره د ګاونډيو هېوادونو همکارۍ ته اړتيا لري.
د ترکمنستان د پوهنې وزارت چارواکي وايي، دغه هېواد تل له افغانستان سره ښې اړیکې لري او د ترکمنستان د همکاریو د دوام ډاډ یې ورکړ.
دوی زیاته کړه چې اوسمهال په ترکمنستان کې ۷۰ افغان زده کړیالان په تخنیکي او مسلکي برخو کې په زده کړو بوخت دي.
