د ځانګړو زده کړو ملي خبرو اترو، کنفرانس دوهمه ورځ په انټرکانټینینټال کې دوام لري
د تخنیکي او مسلکي زده کړو ادارې له خوا د یو شمېر نړیوالو بنسټونو په ګډون د ځانګړو زده کړو ملي خبرو اترو، کنفرانس دوهمه ورځ نن د کابل ښار په انټرکانټینینټال هوټل کې، دوام لري.
د تخنیکي او مسلکي زده کړو ادارې د ځانګړو زده کړو آمر ښاغلي غلام سخي وحدت د ملي او نړیوالو بنسټونو له مسؤلینو سره په دغه کنفرانس کې وویل چې دغې ادارې د معلولیت لرونکو کسانو د خدمت لپاره د نړیوالو موسسو لپاره د همکارۍ ټولې زمینې چمتو کړې دي.
نوموړي ټینګار وکړ چې د معلولیت لرونکو کسانو خدمت کول د هر وګړي انساني دنده ده او باید هغوی ته د رسدنې په پار په ګډه فعالیت ترسره شي.
په افغانستان کې د ناروې کمیټې مشر ددې ناستې په دوام کې څرګنده کړه چې یاد کنفرانس د ټولو بنسټونو او موسسو لپاره یو ښه فرصت دی ترڅو د معلولیت لرونکو کسانو د خدمت لپاره په ګډه کار وکړي.
ښاغلي واټر ډال زیاته کړه چې د اوریدلو او لید معلولیت لرونکو کسانو لپاره د تخنیکي او مسلکي زده کړو ادارې له لوري د مسلکي زده کړو وړاندې کول او د روزنو زمینه برابرول، د ستاینې وړ دي.
د یادونې وړ ده چې اوس مهال بیلابیلې کمیټې د معلولیت لرونکو کسانو ته د خدمتونو وړاندې کولو لپاره د همکاریو د پیاوړتیا او پراختیا په برخه کې کار کوي.
