د تخنیکي او مسلکي زده کړو په یوه ښوونیز مرکز کې د زده کونکو له لوري د میوې ماشین جوړ شوی
د سرپل ولایت د نفتو او ګازو انسټیټوټ د بریښنایی وسایلو د ترمیم او رغونې د لنډمهاله حرفوي پروګرام زده کونکو د لارښود استاد تر لارښوونې توانیدلي چې د میوو ماشین جوړ کړي.
د زده کونکو په وینا، یاد ماشین د انارو، مڼو، ګازرو او کېلو په څیر میوو څخه د اوبو ایستلو وړتیا لري.
په ورته وخت کې، نوموړو زدهکوونکو چې دا ماشین یې جوړ کړی وايي چې دغه ماشین نه یوازې د فابریکې تجهیزاتو د پیرېدلو د لګښت کمولو په برخه کې اغیزمن دی، بلکې د کورنیو او کوچنیو بازارونو په کچه هم کارول کیدی شي.
دا په داسې حال کې ده چې تر اوس مهاله، زرګونه وګړي د تخنیکي او مسلکي زده کړو ادارې له لنډمهاله حرفوي پروګرامونو څخه فارغ شوي او د کار په بازار کې پر دندو بوخت دي.
