د تخنیکي او مسلکي زده کړو ادارې سرپرست د مخابراتو او ټکنالوژۍ له وزیر سره وکتل
د تخنیکي او مسلکي زده کړو ادارې سرپرست الحاج مولوي غلام حیدر شهامت د مخابراتو او معلوماتي ټکنالوژۍ له وزیر مولوي نجیب الله حقاني سره وکتل او خبرې اترې یې وکړې.
یاده ناسته د مخابراتو وزارت کې ترسره شوه، او دواړو خواوو د دواړو ادارو ترمنځ د ګډو همکاریو د پیاوړتیا په اړه بحث وکړ.
د غونډې په پیل کې، د مخابراتو او ټکنالوژۍ وزیر؛ د تخنیکي او مسلکي زده کړو اداره د هیواد یو له مهمو بنسټونو څخه وبلله او زیاته یې کړه چې د مخابراتو وزارت د تخنیکي او مسلکي زده کړو له ادارې سره په ټولو برخو کې همکاري کوي.
مولوي نجیب الله حقاني په خپله وینا کې زیاته کړه چې په اوسنيو شرایطو کې تخنیک او ټکنالوژي د یو هیواد د پرمختګ لومړني توکي ګڼل کېږي.
ښاغلي مولوي حقاني په هیواد کې د ټکنالوژۍ سیسټمونو ارزښت ته په اشارې سره وویل، "اوس مهال، په ډیری سیسټمونو باندې د نوموړي وزارت لخوا کار روان دی، چې په بشپړیدو سره به یې د دفترونو د چارو لویه برخه په ډیجیټل توګه وي."
نوموړي د تخنیکي او مسلکي زده کړو ادارې او مخابراتو وزارت ترمنځ د همکارۍ پر اړتیا ټینګار وکړ.
د دې جلسې په دوام کې، د تخنیکي او مسلکي زده کړو ادارې سرپرست د یادې ادارې د موخو، پروګرامونو او لاسته راوړنو په اړه توضیحات وړاندې کړل.
الحاج مولوي شهامت په خپله وینا کې زیاته کړه چې د تخنیکي او مسلکي زده کړو اداره د تخنیکي او مسلکي زده کړو په وړاندې کولو سره د ټولنې په اقتصادي وده او ځان بسیاینې په برخه کې مهم رول لوبوي.
د تخنیکي او مسلکي زده کړو ادارې سرپرست دغه راز د مخابراتو وزارت سره د همکاریو پر لا پیاوړتیا ټینګار وکړ او څرګنده یې کړه چې د تخنیکي او مسلکي زده کړو ادارې او مخابراتو وزارت ترمنځ همغږي به د هیواد لپاره د ټیکنالوژۍ په برخه کې د لا زیاتو لاسته راوړنو لامل شي.
د دې ناستې په پای کې، دواړو خواوو د ګډې کاري کمېټې پر جوړولو ټینګار وکړ، او پریکړه وشوه چې دا کمېټه ژر تر ژره جوړه او په همغږۍ سره یې چارې ترسره شي.
