د تخنیکي او مسلکي زده کړو ادارې سرپرست د کابل ۱۳ ناحیې له مشرانو سره وکتل او خبرې اترې يې وکړې
د تخنیکي او مسلکي زده کړو ادارې سرپرست ښاغلي مولوي غلام حیدر شهامت د کابل ښار ۱۳ ناحیې له یو شمېر مخورو او مشرانو سره وکتل او خبرې اترې یې ورسره وکړې.
په دغې غونډه کې د ۱۳ مې ناحیې کثیرالرشتوي انسټیټوټ مسئولینو هم حضور درلود.
د دغې لیدنې په پیل کې محمد ظاهر د ۱۳ مې ناحیې د مشرانو په استازیتوب خبرې وکړې. نوموړي د تخنيکي او مسلکي زده کړو ادارې له لاسته راوړنو څخه ستاينه وکړه او ويې ويل، چې د تخنيکي او مسلکي زده کړو ادارې وروستي نندارتون له تخنیکي او مسلکي زده کړو سره د خلکو لېوالتيا زياته کړې ده.
ښاغلي محمد ظاهر زیاته کړه، تخنیکي او مسلکي زده کړې د ټولنې د ودې او پرمختګ لامل ګرځي. له همدې امله د کابل ښار ۱۳ مې ناحیې خلک له تخنیکي او مسلکي زده کړو سره ډېره لېوالتیا لري.
نوموړي دغه راز د کابل ښار په ١٣مه ناحيه کې د کثيرالرشتوي انسټیټوټ د ځينو ستونزو د حل غوښتنه وکړه او په کابل ښار کې يې مناسب ځاى ته د دغه ښوونيز مرکز د انتقال غوښتنه هم وکړه.
په ورته وخت کې ښاغلي مولوي شهامت د تخنیکي او مسلکي زده کړو ادارې ته د کابل ښار ۱۳ مې ناحیې مشرانو د راتګ هرکلی وکړ او زیاته یې کړه چې هڅه کوي د دوی ستونزې هوارې کړي.
همدا اوس د کابل ښار ۱۳مې ناحیې په کثیرالرشتوي انسټیټوټ کې سلګونه محصلین په تخنیکي او مسلکي زده کړو بوخت دي.
