چیني پلاوي د تخنیکي او مسلکي زده کړو ادارې له سرپرست سره وکتل
د تخنيکي او مسلکي زده کړو ادارې سرپرست مولوي غلام حيدر شهامت د چيني شرکت له استازو سره چې د دغې ادارې ودانۍ يې جوړه کړې وکتل.
په دغه کتنه کې دواړو لورو د تخنیکي او مسلکي زده کړو ادارې د بیارغونې د چارو د پیل په اړه خبرې اترې وکړې.
دغه پلاوي د تخنيکي او مسلکي زده کړو له ادارې څخه وغوښتل هغه ځايونه چې ترميم ته اړتيا لري نهايي او اسناد يې د افغانستان د بهرنيو چارو وزارت له لارې د چين له سفارت سره شريک کړي.
دغه راز چیني پلاوي د طعام خورې او جومات د جوړولو په اړه چې مخکې د دغې ادارې له خوا وړاندیز شوی وو، وویل: «موږ به له افغان انجینرانو سره د همکارۍ په موخه چیني انجنیران افغانستان ته را واستوو تر څو په همغږۍ د دغې پروژې د سروې او ډیزاین چارې پیل کړي.»
د دغې غونډې په پای کې د تخنيکي او مسلکي زده کړو ادارې سرپرست مولوي غلام حيدر شهامت د تخنيکي او مسلکي زده کړو له ادارې سره د چين د حکومت د همکاريو ستاينه وکړه.
