مولوي غلام حیدر شهامت په هرات ولایت کې د مجاهدینو له روزنیز بهیر څخه لیدنه وکړه
د تخنیکي او مسلکي زده کړو ادارې سرپرست ښاغلی الحاج مولوي غلام حیدر شهامت د دغې ادارې د یوه پلاوي په مشرۍ د هرات ولایت د تخنیکي او مسلکي زده کړو له مرکزونو څخه د لیدنې په ترڅ کې د هرات ښار په تخنیکي انسټيټوټ کې د مجاهدینو له روزنیز بهیر څخه لیدنه وکړه.
الحاج مولوي غلام حیدر شهامت له مجاهدینو سره په لیدنه کې له نوموړو څخه وغوښتل چې له رامنځ ته شوي فرصت څخه اعظمي ګټه پورته کړي او ځانونه په مدیریتي مهارتونو سمبال کړي تر څو د هیواد په بیلا بیلو برخو کې خپل مسولیت ادا کړي.
هرات ولایت ته د دغه پلاوي د سفر موخه د یاد ولایت د تخنیکي او مسلکي زده کړو د مرکزونو د ستونزو او ننګونو هوارول ویل شوي دي.
دا په داسې حال کې ده چې اوس مهال په ټول هېواد کې شاوخوا ۳۵ زره تنه مجاهدین د تخنیکي او مسلکي زده کړو په مرکزونو کې په زده کړو بوخت دي.
