د ملي بنسټونو او مؤسسو له لوري د هیواد روښانزړو او ناشنوایانو څخه پر هراړخیز ملاتړ ټینګار
د تخنیکي او مسلکي زده کړو ادارې، په هېواد کې دننه مؤسسو او نهادونو د یادې ادارې د ځانګړو زدهکړو له برخې څخه د ملاتړ په پار یولړ مراسم ترسره کړل.
په یادو مراسمو کې د هیواد دننه یوشمیر مؤسسو او بنسټونو استازو، د تخنیکي او مسلکي زده کړو ادارې مقاماتو او یوشمیر نابینا و ناشنوا وګړو هم حضور درلود.
د ناستې په پیل کې عبدالصمد امیری د رفاهي او خدماتي مؤسسې مشر وویل چې هیواد کې د لید او اوریدلو معلولیت لورنکي وګړي هر اړخیز ملاټر ته اړتیا لري.
نوموړي د روښانزړو او ناشنوایانو لپاره د خدمت کولو په برخه د تخنیکي او مسلکي زده کړو ادارې د رهبرۍ له زیارونو څخه د قدردانۍ ترڅنګ ټینګار وکړ چې د یادې ادارې سره به اوږه په اوږه د یادو کسانو ملاټر کوي.
په ورته وخت کې د ناشنوایانو ملي مؤسسې مشر عبدالغفار مومند هم د وینا پرمحال څرګنده کړه چې معلولیت ضعف نه بلکه د یو انسان د قوت نقطه ده. ښاغلي مومند دغه راز ژمنه وکړه چې د تخنیکي او مسلکي زده کړو له ادارې سره د معلولیت لرونکو وګړو د زده کړو په برخه کې پوره همکاري کوي.
د ناستې په دوام کې په افغانستان کې د ناروې کمیټې استازي ښاغلي طارق دانشیار هم د معلولیت لرونکو وګړو څخه پر ملاتړ ټینګار وکړ او په دې برخه کې یې د تخنیکي او مسلکي زده کړو ادارې له فعالیتونو څخه ستاینه وکړه.
د غونډې په ترڅ کې د تخنیکي او مسلکي زده کړو ادارې د تضمین کیفیت رئیس ښاغلي سید مبشرآغا د ادارې په استازيتوب د اورېدنې او لېدنې معلولیت لرونکو کسانو د ملاټر کوونکو همکارو موسسو څخه د هر اړخیزو همکاریو په پار ستاینه وکړه.
نوموړي داهم هم زیاته کړه چې د تخنیکي او مسلکي زده کړو اداره د هیواد په ۱۸ ولایتونو کې ۲۰ د ځانګړو زده کړو ښوونیز مرکزونه لري چې په یادو مرکزونو کې د اورېدنې او لېدنې معلولیت لرونو کسانو ته مسلکي زده کړې وړاندې کېږي.
د غونډې په پای کې د ځانګړو زده کړو ښوونیز مرکزونو مخکښ زده کوونکو او زده کړیالانو ته ستاینلیکونه هم ورکړل شول او غونډه په دعایې سره پای ته ورسیده.
