د تخنیکي او مسلکي چارو مرستیال د غزني له سیمه ییزو چارواکو سره خبرې اترې وکړې
د تخنيکي او مسلکي زده کړو ادارې پلاوي ولايتونو ته د خپل سفر په ترڅ کې د غزني له مرستیال والي په ګډون له ځايي چارواکو سره وکتل او خبرې اترې يې ورسره وکړې.
د غونډې په پيل کې د غزني مرستيال والي ښاغلي مولوي رحيم الله محمود د تخنيکي او مسلکي زده کړو پر ارزښت خبرې وکړې او په غزني ولايت کې يې د مجاهدينو د روزنې په ګډون د دغې ادارې د برنامو ستاينه وکړه.
د غزني مرستیال والي زیاته کړه، «هغه برنامې چې تېر کال د تخنیکي او مسلکي زده کړو ادارې له لورې د مجاهدینو او نویو ګمارل شویو کارکوونکو لپاره په لاره اچول شوی و، ډېرې ګټورې او اغېزمنې پایلې یې درلودې» نوموړی د داسې برنامو د دوام غوښتنه وکړه.
ورپسې د تخنيکي او مسلکي چارو مرستيال ښاغلي مولوي غلام سعيد احساس خبرې وکړې او د دغې ادارې له خوا مجاهدينو لپاره د جوړې شوې روزنيزې طرحې په اړه توضیحات ورکړل.
د دغې ناستې په پای کې ښاغلي مولوي رحیم الله محمود د غزني ولایت د تخنیکي او مسلکي زده کړو له مرکزونو سره د لا زیاتو همکاریو ډاډ ورکړ.
