د تخنیکي او مسلکي زده کړو ادارې مشرتابه پلاوي غونډه ترسره شوه
د تخنيکي او مسلکي زده کړو ادارې مشرتابه پلاوي غونډه د یادې ادارې سرپرست ښاغلی مولوي غلام حيدر شهامت په مشرۍ ترسره شوه.
په یاده ناسته کې چې رئیسانو او آمرینو هم حضور درلود، د نویو ګمارل شویو آمرینو لپاره د سیمینار د جوړولو، بودجې د لګولو چټکتیا، د ادغام شویو ښوونځیو او انسټیټونو وضعیت او د کتابونو د وېش په اړه خبرې وشوې.
د غونډې برخه والو د پورتنیو موضوعاتو په اړه خپل نظرونه شریک کړل او د تخنیکي او مسلکي زده کړو ادارې مشرتابه له خوا د چارو ترسره کیدو په موخه لازمې لارښوونې وکړی.
د غونډې د پرېکړې له مخې، د نصاب، خدماتو او د پلان ریاست په همکارۍ او همدارنګه د تدارکاتو آمریت مکلف شول چې ژر تر ژره په ولایتونو کې د کتابونو د وېش بهیر پیل کړي.
دغه راز د بودجې تسریع کميټې ته دنده وسپارل شوه چې په خپل وخت د بودجې د لګولو لپاره اقدام وکړي.
د تخنیکي او مسلکي زده کړو ادارې د مشرتابه په غونډه کې د اړونده مرکزونو ادغام وضعیت وارزول شو او د نظارت رئیس په دې برخه کې د ترسره شویو کړنو راپور وړاندې کړ.
