د تخنیکي او مسلکي زده کړو ادارې له پنځه کورنیو او بهرنیو بنسټونو سره تړونونه امضا کړل
د تخنیکي او مسلکي زده کړو ادارې د ۱۲۰ ملیون افغانیو په ارزښت له پنځه کورنیو او بهرنیو بنسټونو سره د مرستې تړونونه امضا کړل.
دغه بنسټونه د ناورې کمېټه، د انافي مؤسسه، د افغانانو لپاره د ښه ژوند مؤسسه، د اوسپنې پټلۍ اداره او علامه د لوړو زده کړو مؤسسه دي.
مفتي فضل الرحمن فاضل، د تخنیکي او مسلکي زده کړو ادارې د مالي او اداري چارو مرستیال د دغه پروګرام د پرانیستلو په مراسمو کې د تړونونو په هکله جزئیات وړاندې کړل.
ددغه مراسمو په دوام کې، ملابخت الرحمن شرافت، د اوسپنې پټلۍ ادارې رئیس وینا وکړه، او د تخنیکي او مسلکي زده کړو ادارې له همکاریو څخه یې مننه وکړه.
ښاغلي شرافت زیاته کړه چې تخنیکي او مسلکي زده کړو اداره د اوسپنې پټلۍ له ادارې سره ښې همکاری لري، نوموړي زیاته کړه چې ددغه تړون په امضا کولو سره به د دواړو بنسټونو ترمنځ همکاری لا زیاتې شي.
د اوسپنې پټلۍ ادارې رئیس وویل: ټولې برخې تخنیکي او مسلکي کسانو ته اړتیا لري، او د تخنیکي او مسلکي زده کړو اداره ټولنې ته د متخصصو او مسلکي کسانو د تربیه کولو ځای دی.
دغه مراسم، د تړونونو په امضا کولو او افغانستان ته د خیر په دعا سره پای ته ورسېدل.
