رفیع الله حبیبي د کابل ولایت د تخنیکي آمر په صفت معرفي شو
د کابل ولایت د تخنیکي او مسلکي زده کړو د نوي آمر په صفت د رفیع الله حبیبي د معرفي کولو مراسم د یاد ولایت د تخنیکي او مسلکي زده کړو د مرکزونو د آمرینو په حضور کې ترسره شول.
په دغه مراسمو کې د زده کوونکو او زده کړیالانو چارو رئیس مفتي سید احسان الله قاسمي او د تخنیکي او مسلکي زده کړو ادارې ویاند نجیب الله امین هم حضور درلود.
د زده کوونکو او زده کړیالانو چارو رئيس د ښاغلي حبيبي د پخوانيو کړنو د ستايني په ترڅ کي وويل چي د کابل ولايت په تخنيکي آمریت کي تغیرات د کارونو د ښه والي په موخه ترسره شوې دي.
ښاغلي قاسمي هم دنده یو مهم مسؤلیت وباله او ویې ویل چې باید دغه مسؤلیت په سمه توګه ترسره شي.
نوموړي دغه راز د هېواد په اقتصادي وده کې د تخنیکي او مسلکي زده کړو د مرکزونو رول مهم وباله او د هېواد د بچیانو لپاره یې د زده کړو پر اهمیت ټینګار وکړ.
په همدې حال کې د تخنیکي او مسلکي زده کړو ادارې ویاند نجیب الله امین د ښاغلي حبیبي د تېرو لاسته راوړنو ستاینه وکړه او هغه ته یې د خدای له درباره په نویو کارونو کې د بریالیتوب هیله وکړه.
په دوام کې د کابل نوی تخنيکي آمر رفيع الله حبيبي خبرې وکړې او د کابل ولايت له تخنيکي او مسلکي آمرینو څخه يې وغوښتل چې د خپلو دندو په سرته رسولو کې د لوى خداى (ﷻ) د رضايت په خاطر هلې ځلې وکړي.
نوموړي همداراز ټینګار وکړ، چې د هېواد د بچیانو روزنه یو ډېر مهم مسؤلیت دی او په دې برخه کې ناغیړې لوی خیانت ګڼل کېږي.
په دوام کې د تخنيکي او مسلکي زده کړو د مرکزونو آمرینو په دغې ناسته کې خپلې ستونزې او ننګونې شريکې کړې او مسئولينو يې د ستونزو په هواري کې د همکارۍ ژمنه وکړه.
پخوا رفیع الله حبیبي د اوبو او انرژۍ انسټیټوټ آمر په صفت دنده ترسره کوله.
