د کابل ولایت د تخنیکي او مسلکي زده کړو آمریت لخوا فراغت غونډه جوړه شوه
د کابل ولایت د تخنیکي او مسلکي زده کړو آمریت د استالف، میربچه کوټ، شکردرې او کلکان ولسوالیو د تخنیکي او مسلکي زده کړو مرکزونو څخه د زده کوونکو د فراغت په پار شانداره غونډه جوړه کړه.
یاد پروګرام په ميربچه کوټ ولسوالۍ کې جوړ شو، چې په کې سيمه ييزو مسوولينو، علماوو او د تخنيکي او مسلکي زده کړو ادارې يو شمېر مسوولينو هم برخه اخيستې وه.
په دې خپرونه کې مشرانو او مسوولینو د خبرو پر مهال وویل چې تخنیکي او مسلکي زده کړې د هېواد په پرمختګ، ترقي او پر ځان بسیاینې کې مهم رول لري. نوموړو د تخنیکي او مسلکي زده کړو ادارې د پروګرامونو په ملاتړ هم ټینګار وکړ.
له بلې خوا په دې مراسمو کې ويناوالو له فارغ شويو ځوانانو وغوښتل چې له خپلو مهارتونو او پوهې څخه په استفادې د افغانستان د پرمختګ او بیارغونې په برخه کې لا زيات زیار او کوښښ وګالي.
دغه راز په همدې مراسمو کې د سولر سیسټم او خیاطۍ د لنډ مهاله حرفوي پروګرامونو یو شمېر فارغانو هم د درې میاشتني لنډ مهاله روزنیزو دورو له بشپړولو وروسته خپل فراغت ولمانځه.
د دغه پروګرام په وروستۍ برخه کې فارغ شویو محصلینو ته ستاینلیکونه ورکړل شول او مراسم د دعایې په ویلو سره پای ته ورسیدل.
