د نیما انسټیټوټ زده کونکو ته د فکري روښانتیا « تنویر» پروګرام ترسره شو
د تخنیکي او مسلکي زده کړو ادارې د "نیما" ادارې او مدیریت ملي انسټیټوټ د زده کونکو د فکري او فرهنګي روښانتیا « تنویر» لپاره یو ښوونیز پروګرام ترسره کړ.
په دې پروګرام کې د اطلاعاتو او کلتور وزارت د ځوانانو چارو مرستیال ښاغلي مولوي محمد یونس راشد په ګډون یو شمیر مقاماتوګډون درلود او ویناوې یې هم وکړې.
محترم مولوي راشد د فکري تنویر پروګرام کې د وینا پر مهال وویل چې انسانان د خدای تعالی د عبادت او بندګۍ لپاره پیدا شوي او د روایتونو له مخې، انسانان په ځمکه کې د خدای تعالی خلیفه دي.
د ځوانانو چارو مرستیال دا هم زیاته کړه چې ځوانان باید په بشپړه توګه د اسلامي احکامو او قوانینو څخه اطاعت او پیروي وکړي او خپل فکرونه او عملونه د رسول الله صلی الله علیه وسلم د سنت سره سم برابر کړي.
په دوام کې د تخنیکي او مسلکي زده کړو ادارې د ارشاد او دعوت رئیس هم وینا وکړه او ویې ویل چې د ځوانانو د فکري روښانتیا او تنویر لپاره د داسې پروګرامونو ترسره کول خورا ګټور دي.
د تخنیکي او مسلکي زده کړو ادارې د ارشاد او دعوت ریاست د مسؤلینو په وینا، دا پروګرام به د یکشنبې او دوشنبې پر ورځو هم په نیما انسټیټوټ کې دوام وکړي.
