د تخنیکي او مسلکي زده کړو په برخه کې د پانګوالو لېوالتیا زیاتوالی
ښاغلی شینواری یو له هغو افغان مهاجرینو څخه دی چې په هالنډ کې ژوند کوي، د تخنیکي او مسلکي زده کړو په برخه کې د پانګونې په موخه افغانستان ته راغلی دی.
نوموړي د خپلې پروژې د پیلولو څرنګوالي په اړه د تخنیکي او مسلکي زده کړو ادارې سرپرست له ښاغلي مولوي غلام حیدر شهامت سره وکتل او خبرې یې وکړې.
په دغې کتنه کې د تخنیکي او مسلکي زده کړو ادارې سرپرست په هېواد کې ټولیز امنیت ته په اشارې سره وویل، چې حکومت دا مهال په هېواد کې د پانګوالو ملاتړ کوي.
ښاغلي مولوي شهامت همدا راز وویل، چې د تخنیکي او مسلکي زده کړو ادارې د ټولو هغو طرحو او برنامو هرکلی کوي، چې د ولس او هېواد په ګټه وي.
له بلې خوا ښاغلي شینواري په اقتصادي او امنیتي برخو کې د حکومت د وروستیو لاسته راوړنو ستاینه وکړه او ویې ویل چې د کرنې په ګډون د مسلکي زده کړو په برخو کې پانګونې ته لیواله دی.
ښاغلي شینواري زیاته کړه چې غواړي خپله پروژه له کنړ ولایته پیل کړي او نورو ولایتونو ته هم وغځوي.
نوموړي دغه راز د تخنيکي او مسلکي زده کړو په برخه کې د پانګونې موخه خلکو او ټولنې ته د خدمت کول دي او ويې ويل، چې د دغه پروژې د طرحې له مخې به يې ټول عوايد په هېواد کې ولګول شي.
په دغې ناسته کې پرېکړه وشوه، چې د ګډې همکارۍ هوکړه لیک پر بنسټ به چارې پر مخ وړي.
