د تخنیکي او مسلکي زده کړو ملي ادارې له حرفوي پروګرامونو څخه نږدې سل تنه فارغ شول
د لنډ مهاله حرفوي روزنیزو پروګرامونو هغه دوره چې شاوخوا درې میاشتې وړاندې په احمدشاه بابا کثیرالرشتوي انسټيټوټ کې په لاره اچول شوې وه پای ته ورسیده.
په دغه روزنیز پروګرام کې شاوخوا ۱۰۰ تنو ته د ګرځنده تیلیفونونو د ترمیم، خیاطۍ او فلزکارۍ په برخه کې په عملي بڼه روزنه ورکړل شوه.
په همدې حال کې د دغه ښوونیز پروګرام فارغانو د دغه پروګرام د ترسره کولو له امله د تخنیکي او مسلکي زده کړو ادارې له رهبرۍ څخه د مننې ترڅنګ زیاته کړه چې اوس کولای شي په هغو برخو کې کار وکړي چې دوی په کې روزل شوي دي.
نوموړي د محصلینو په زده کړه کې د عملي زده کړو رول مهم بولي او له مسوولینو یې وغوښتل ، چې د تخنیکي او مسلکي زده کړو په مرکزونو کې د عملي زده کړو لړۍ لا پياوړې کړي.
دا په داسې حال کې ده چې د تخنيکي او مسلکي زده کړو ادارې رهبري تل د تخنيکي او مسلکي زده کړو په مرکزونو کې د عملي زده کړو پر لا پياوړتيا ټينګار کوي.
د يادونې وړ ده، چې حرفوي پروګرامونه د تخنيکي او مسلکي زده کړو ادارې له مهمو پروګرامونو څخه دي، چې تر دې مهاله په سلګونو کسان له يادو پروګرامونو فارغ او په بازار کې په دندو بوخت دي.
