د تخنیکي او مسلکي زده کړو ادارې پلاوي د میدان وردګو ولایت له تخنیکي مرکزونو څخه لیدنه وکړه
د تخنیکي او مسلکي زده کړو ادارې څخه یوه پلاوي د یادې ادارې د تخنیکي او مسلکي چارو مرستیال محترم مولوي غلام سعید احساس په مشرۍ میدان وردګ ولایت ته د خپل سفر په ترڅ کې د یاد ولایت له تخنیکي مرکزونو څخه لیدنه وکړه.
په دې لیدنه کې د سیداباد ولسوالۍ کثیرالرشتوي انسټيټوټ، د جغتو ولسوالۍ کثیرالرشتوي انسټيټوټ او د تنګي نور درې کثیرالرشتوي انسټيټوټ د تدریسي چارو له وضعیت څخه څارنه وشوه.
یاد پلاوي د تخنیکي او مسلکي زده کړو مرکزونو د څېړنې په ترڅ کې د یادو مرکزونو ستونزې او ننګونې له نږدې وکتلې او د دغو مرکزونو ستونزو او ننګونو ته د رسیدګۍ په برخه کې یې له مسولینو سره د همکارۍ ژمنه هم وکړه.
دغه راز نوموړي پلاوي د یادو مرکزونو له مسوولينو څخه وغوښتل چې د محصلينو لپاره د عملي زده کړو په برخه کې زياتې هلې ځلې وکړي. له بلې خوا دغه پلاوي د تخنیکي مرکزونو مسوولینو ته د چارو د ښه والي په موخه لازمې او مسلکي لارښوونې هم وکړې.
