د تخنيکي او مسلکي چارو مرستيال لوګر ولايت ته سفر وکړ
د ولایتي سفرونو په دوام کې د تخنیکي او مسلکي چارو مرستیال مولوي غلام سعید احساس د یوه پلاوي په مشرۍ لوګر ولایت ته سفر وکړ.
ښاغلي احساس لوګر ولایت ته د خپل سفر په ترڅ کې د یاد ولایت د والي شیخ ضیاءالرحمن مدني په ګډون له سیمه ییزو چارواکو سره وکتل او خبرې اترې یې وکړي.
د تخنيکي او مسلکي چارو مرستيال د لوګر له والي سره په کتنه کې د تخنيکي او مسلکي زده کړو په ارزښت خبرې وکړې او ويې ويل چې دغه اداره د حرفوي او ماهر کاري ځواک په روزلو سره د هېواد د اقتصاد د ودې لپاره کار کوي.
ښاغلي احساس د تخنيکي او مسلکي زده کړو ادارې د نوښت مرکز د جوړېدو يادونه وکړه او ويې ويل، چې دغه مرکز د نوښتګرو کسانو د جذبولو او له هېواده د ځوانانو د کډوالۍ د مخنيوي په موخه جوړ شوى دى.
په دغې کتنه کې ښاغلي احساس د مجاهدینو لپاره د تخنیکي او مسلکي زده کړو د ادارې له خوا د تدوین شوې ښوونیزې طرحې یادونه وکړه او ویې ویل، چې د دغې طرحې په پلي کیدو سره به مجاهدینو ته د عصري علومو د زده کړې زمینه برابره شي.
په دوام کې د لوګر والي شیخ ضیاءالرحمن مدني د تخنیکي او مسلکي زده کړو اداره د کارموندنې او اقتصادي بسیاینې په برخه کې خورا مهم وباله او د دغې ادارې د برنامو ملاتړ په برخه کې د هر اړخیزې همکارۍ ژمنه وکړه.
ښاغلي مدني د مجاهدینو د ښوونیزه برنامه په نیکۍ سره یاده کړه او د دغې طرحې په پلې کولو کې یې د همکارۍ ژمنه وکړه.
همدارنګه د تخنیکي او مسلکي زده کړو ادارې پلاوي د لوګر ولایت د تخنیکي او مسلکي زده کړو له مرکزونو څخه لیدنه وکړه.
په دغې کتنه کې دوی په لوګر ولایت کې د تخنیکي او مسلکي زده کړو د مرکزونو وضعیت وارزاوه او د شته ننګونو په حل کې یې د همکارۍ ژمنه وکړه.
تر دې وړاندې هم د تخنيکي او مسلکي زده کړو اداري پلاوي د تخنيکي او مسلکي زده کړو په مرکزونو کې د شته ننګونو د حل په موخه يو شمېر ولايتونو ته سفرونه کړی او ټاکل شوې چې دغه سفر د هېواد ټولو ولايتونو ته ترسره شي.
