د افغانستان د روباټیک ټیم له رئیس سره د تخنیکي او مسلکي زده کړو ادارې پلاوي خبرې او اترې

د تخنيکي او مسلکي زده کړو ادارې يوه پلاوي، د مولوي نيک محمد نېکمل له ډونرانو سره د همغږۍ آمر او مفتي نورمحمد اعتمادي د تخنيکي او مسلکي چارو معاونیت سلاکار په غړیتوب د افغان روباټیک ټيم له مشر سره وکتل.

په دې کتنه کې د روباټیک ټیم مشر عتیق الرحمن خوشحال د یاد ټیم د کړنو او نوښتونو په اړه خبرې وکړې.

هغه وویل، د افغانستان د روباټیک ټیم د بې پیلوټه الوتکې، مصنوعي لاس، د میوو وچولو ماشین او د برقي موټرو په جوړولو کار کوي.

ښاغلي خوشحال د افغانستان د روباټیک ټیم د طرحو د پرمختګ په برخه کې د تخنیکي او مسلکي زده کړو له ادارې څخه د همکارۍ غوښتنه وکړه.

د تخنیکي او مسلکي زده کړو ادارې پلاوي د روباټیک ټیم څخه وغوښتل چې خپل وړاندیزونه د دې ادارې مشرتابه ته وسپاري.

د تخنیکي او مسلکي زده کړو ادارې د نوښتګرو ځوانانو د ملاتړ په موخه د نوښت مرکز جوړ کړی دي. چې په دې مرکز کې په دې وروستیو کې یو موټر جوړ شوی دی.