تخنیکي او مسلکي زده کړو ادارې د ستراتیژۍ مسودې دريمه مشورتي غونډه جوړه شوه
د تخنيکي او مسلکي زده کړو ادارې د ستراتيژۍ مسودې دریمه مشورتي غونډه نن چهارشنبه د پلان او ارزونې ریاست سرپرست ښاغلي جلال الدین عطایي په مشرۍ، چې د مقام دفتر ريیس ښاغلي محمد فهیم شریفي او د تخنيکي او مسلکي زده کړو ادارې ولایتي آمرینو هم پکې ګډون درلود، ددې ادارې په کنفراس خونه کې جوړه شوه.
په دغه غونډه کې د تخنیکي او مسلکي زده کړو ادارې د ستراتيژۍ په اړه د مشورې اغیزمنتوب، له ولایتي ادارو څخه نظر غوښتنه او د ولایتي آمرینو څخه د نظریاتو او وړانديزونو په راټولولو بحث، او خپل نظریات تبادله کړل.
د تخنيکي او مسلکي زده کړو ادارې د ستراتيژۍ مسودې مشورتي غونډه پداسې حال کې جوړېږي، چې څه موده مخکې هم ولايتي آمرین او له مرکز څخه د انسټيټوټونو او ښوونځيو ښوونکي او مدیران د مشورې ورکولو په موخه د تخنیکي او مسلکي زده کړو ادارې مقر ته رابلل شوي و، چې پدې اړه ورته د پلان او ارزونې ریاست لخوا د یوې ورځې لپاره پریزنتیشن ورکړل شو.