د میدان وردګو ولایت چک ولسوالۍ کثیرالرشتوي انسټیټوټ محصلینو ته د ساختمان په اړه روزنه ورکړل شوه
علمي سفرونه د نظري زده کړو، کاري او صنعتي چاپیریال واقعیتونو ترمنځ د نښلولو لپاره له خورا اغیزمنو لارو څخه ګنل کېږي. په ښوونیزو چاپیریالونو، په ځانګړي توګه د تخنیکي او مسلکي زده کړو په مرکزونو کې، عملي زده کړې د محصلینو د مهارتونو په لوړولو او د کار بازار لپاره د هغوی په چمتو کولو کې کلیدي رول لوبوي.
په همدې اساس، د میدان وردګو ولایت اړوند چک ولسوالۍ کثیرالرشتوي انسټيټوټ د ساختماني څانګې محصلینو په دې ولسوالۍ کې د برق فابریکې نوی جوړیدونکي تعمیر څخه د یو علمی سفر په ترڅ کې لیدنه وکړه.
لارښود استاد د دې علمي سفر په ترڅ کې، محصلینو ته د ساختماني چارو لکه د شاقول کولو طریقه او د اضافې اوبو لپاره د سپتیک جوړښت په اړه مفصل توضیحات وړاندې کړل او د نوموړو پوښتنو ته یې هم ځوابونه ورکړل.
د عملي روزنو زده کړه محصلینو سره مرسته کوي چې هغوی مطالب په ژور فکر او علمي مفاهیم په ډیر کاربردي او عملي ډول درک کړي.
له همدې امله، د تخنیکي او مسلکي زده کړو ادارې رهبري تل هڅه کوي چې د تخنیکي او مسلکي زده کړو په مرکزونو کې د عملي زده کړو لړۍ پیاوړې کړي.
