د غزني ولایت د تخنیکي او مسلکي زده کړو آمریت او غزني پوهنتون ریاست ترمنځ د ګډو همکاریو تفاهم لیک لاسلیک شو
د غزني ولایت د تخنیکي او مسلکي زده کړو آمر مولوي عتیق الله محمدي د غزني پوهنتون ریاست له رئیس مولوي عبدالواسع «منصور» سره د ګډو همکاریو تفاهم لیک لاسلیک کړ.
د یاد تفاهم لیک پر بنسټ به د غزني پوهنتون ریاست د تخنیکي او مسلکي زده کړو مرکزونو فارغان د لوړو زده کړو د دوام په موخه په یاد پوهنتون کې جذب کړي.
په دې تفاهم لیک کې همداراز راغلي چې د غزني پوهنتون ریاست به د غزني ولایت د تخنیکي او مسلکي زده کړو مرکزونو د استادانو او کارکوونکو لپاره د ظرفیت لوړونې پروګرامونه په لاره واچوي.
له بلې خوا د محصلینو د پرکتیک دورې لپاره زمینه برابرول او د غزني پوهنتون ریاست له لابراتوار، کتابتون، کمپیوټرلب او نورو شته امکاناتو څخه د محصلینو ګټه اخیستنه د دغه تفاهم لیک له موادو څخه دي.
دا په داسې حال کې ده چې د غزني ولایت د تخنیکي او مسلکي زده کړو آمریت له دې وړاندې د غزني تخنیکي پوهنتون او سلطان محمود غزنوي لوړو زده کړو موسسې سره د ګډو همکاریو تفاهم لیکونه لاسلیک کړي دي.
