د تخنیکي او مسلکي زده کړو ادارې معلوماتي ټکنالوجۍ امریت خپل کاري راپور وړاندې کړ
د راپور ورکولو په بهیر کې؛ د تخنیکي او مسلکي زده کړو ادارې معلوماتي ټکنالوجۍ آمریت د خپلو فعالیتونو او پروګرامونو په اړه معلومات د ادارې رهبرۍ ته وړاندې کړل.
د معلوماتي ټکنالوجۍ سرپرست محمد ضمير احمدزي د راپور ورکولو پر مهال دغه امریت د دې ادارې يوه مهمه برخه وبلله او ويې ويل، چې ددوی دنده او مسؤلیت یې د ادارې شبکو تنظیم او کنټرولول، د هارډوير او سافټوير ننګونو پېژندنه او حل کول او تخنیکي تجهیزات عیارول دی.
نوموړي د تخنيکي او مسلکي زده کړو ادارې شبکې په دې وروستيو کې تحليل او ارزونې ته په اشارې سره وويل، امنيتي کمری او د دې ادارې اوسنى سيسټم د وسايلو د کمښت او تخنيکي ستونزو له امله غير فعال دى.
احمدزي زیاته کړه چې د دغو شبکو د فعالولو هڅې روانې دي.
د معلوماتي ټکنالوجۍ سرپرست زیاته کړه، له ادارې شبکې څخه د استفادې پالیسۍ جوړول، د معلوماتي ټکنالوجۍ انسټیټوټ زده کړیالانو ته د عملي کار زمینه برابرول او د ادارې او انسټیټونو ترمنځ د داخلي شبکو رامنځته کول د دې امریت د راتلونکو پلانونو برخه دي. نوموړي د کارونو د لا ښه والي په موخه وړانديزونه هم وکړل.
د تخنيکي او مسلکي زده کړو ادارې سرپرست ښاغلی مولوی غلام حيدر شهامت د معلوماتي ټکنالوجۍ امریت د چارواکو راپورونه او وړانديزونه واورېدل او ويې ويل، چې د ټکنالوژۍ په عصر کې د دې امریت د کار څرنګوالی ډېر مهم دی.
هغه زياته کړه، چې د تخنيکي او مسلکي زده کړو اداره د مسلکي زده کړو وړاندې کول مسووليت لري، بايد د ټکنالوژۍ په برخه کې هم غښتلی او لوړ وي.نوموړي د معلوماتي ټکنالوجۍ امریت له چارواکو وغوښتل، چې د دغه ادارې د ټکنالوجۍ څانګو د پراختيا او فعالولو لپاره کار وکړي.
نوموړي ژمنه وکړه، چې د معلوماتي ټکنالوجۍ په امریت کې به د شته ننګونو د له منځه وړلو او د وسايلو د کمښت د حل لپاره کار وکړي.
