د تخنیکي او مسلکي زده کړو ادارې مشر د WFP موسسی له استازي سره وکتل
د تخنیکي او مسلکي زده کړو ادارې مشر ښاغلی مفتی فضل الرحمن فاضل د خوراک نړیوال پروګرام (WFP) له استازي سره وکتل.
په دې کتنه کې ښاغلي فاضل لومړی د تخنیکي او مسلکي زده کړو ادارې غوښتنې او وړاندیزونه د دغه موسسی له استازي سره شریک کړل او په ټولو تخنيکي او مسلکي زده کړو په ځانګړي ډول د ځانګړو زده کړو په برخه کې یې د مرستې او همکارۍ غوښتنه وکړه.
ښاغلي فاضل د یادې موسسی له استازی څخه وغوښتل، چې په هېواد کې د دې ادارې ټول ښوونيز مرکزونه له خپلو ښوونيزو مرستو څخه برخمن کړی؛ ځکه چې د افغانستان خلک له څلویښت کلنې جګړې وروسته بشري مرستو ته سخته اړتیا لری.
همدارنګه انجنیر حفیظ الرحمن ناصري؛ د دغه موسسی د فنی او حرفوی زده کړو د پروګرامونو همغږی کوونکی؛ د تخنیکي او مسلکي زده کړو د تمویل څرنګوالي په اړه خبرې وکړې او د تخنیکي او مسلکي زده کړو له ادارې څخه یې وغوښتل چې د روزنیزو پروګرامونو د تمویل په اړه د وړاندیزونو د پلی کیدو په برخه کې منظمه طرحه وړاندې کړي.
