د تخنیکي او مسلکي زده کړو ادارې د رهبرۍ غونډه ترسره شوه
د تخنیکي او مسلکي زده کړو ادارې د رهبرۍ شورا ناسته د دې ادارې د رئیس ښاغلي الحاج مولوي غلام حیدر شهامت په مشرۍ او د محترمو مرستیالانو په شتون کې ترسره شوه.
ددې غونډې موخه د تخنیکي او مسلکي زده کړو په مرکزونو کې د شته ستونزو او ننګونو د حل کولو پر څرنګوالي بحث ویل شوی دی.
په ورته وخت کې، ښاغلي مولوي غلام حیدر شهامت، چې تر دې وړاندې یې د بدخشان ولایت په ګډون یو شمیر ولایتونو ته سفر کړی و، زیاته یې کړه چې د ښوونیز نصاب، څارنې او ارزونې او همدارنګه د استادانو د ګمارنې په برخه کې باید زیاته پاملرنه وشي.
نوموړي دغه راز وویل چې وړ استادان، وړ زده کونکي روزي، له همدې امله اړینه ده چې استادان د وړتیا، لیاقت او مسلک پر بنسټ د تخنیکي او مسلکي زده کړو په مرکزونو کې مقرر شي.
له بلې خوا، یو شمیر نورو رئیسانو هم په دې اړه خپل نظرونه او لیدلوري شریک کړل او الحاج مولوي غلام حیدر شهامت د تخنیکي او مسلکي زده کړو ادارې په چارو کې د شفافیت پر پلي کولو ټینګار وکړ.
په غونډه کې پر نورو اړوندو موضوعاتو هم بحث وشو او غونډه د دعا په ویلو سره پای ته ورسېده.
