د تخنیکي او مسلکي زده کړو د شمال زون رئیس معرفي شو
ښاغلی مولوي نورالله صلاحالدین امیني په بلخ ولایت کې د یوې غونډې په ترڅ کې د تخنیکي او مسلکي زده کړو د شمال زون د رئیس په توګه معرفي او خپله دنده یې پیل کړه.
په دې مراسمو کې چې د تخنیکي او مسلکي زده کړو د شمال زون رئیس د معرفي کیدو په مناسبت جوړه شوې د بلخ ولایت یو شمیر سیمه ییزو چارواکو، علماوو او د ددې ولایت د تخنیکي زده کړو مرکزونو مسؤلینو هم ګډون درلود.
په دې غونډه کې ګډونوالو د تخنیکي او مسلکي زده کړو د زونونو جوړیدل د تحصیلی او تعلیمي فرصتونو په برابرولو کې یو نیک ګام وباله او ژمنه یې وکړه چې په خپل ټول توان سره به له دې ریاست سره همکاري وکړي.
دغهراز مولوي نورالله صلاحالدین امیني د مراسمو په پای کې وویل چې په چارو کې اخلاص کول عبادت دی. نوموړي زیاته کړه چې نوموړی به په بشپړ اخلاص، ژمنتیا او ایماندارۍ سره، په شمال زون کې د تخنیکي او مسلکي زده کړو د ودې او پرمختګ لپاره نه ستړې کېدونکې هڅې وکړي.
