د کوهبند کرنې مسلکي انسټيټوټ استادانو لپاره د ظرفیت لوړونې سیمینار ترسره شو
د کاپیسا ولایت د کوهبند ولسوالۍ اړوند کرنې مسلکي انسټيټوټ د رسمي او حق الزحمه استادانو لپاره د ظرفیت لوړونې سیمینار ترسره شو.
په دې پروګرام کې ۱۱ تنه رسمي او حق الزحمه استادانو ګډون درلود، چې نوموړو ته د تدریس اصولو، د ښوونیزو پلانونو ترتبولو او د صنف دمدیریت کولو په اړه روزنه ورکړل شوه.
د کاپیسا د تخنيکي او مسلکي زده کړو آمریت د مسوولينو په وينا، د دغه ښوونيز سيمينار له ترسره کولو څخه يې موخه د یاد ولایت په تخنیکي مرکزونو کې د استادانو د ظرفيتونو لوړول دي.
دا په داسې حال کې ده چې، د تخنیکي او مسلکي زده کړو ادارې رهبري، د کار بازار اړتیاوو او نوي تعلیمي معیارونو ته په ټینګار سره، هڅه کوي چې د دې پروګرامونو له لارې د زده کړې کیفیت ښه کولو او د کار بازار لپاره د زده کونکو د ښه چمتو کولو لپاره زمینه برابره کړي.
