په بریل لیک د قرآن عظیم الشأن لیکلو د بیاکتنې کمیټې کار پیل شو
د هیواد د روښانزړو لپاره په بریل لیک د قرآن عظیم الشأن لیکلو د بیاکتنې کمیټې کاري لړۍ نن په تخنیکي او مسلکي زده کړو اداره کې پیل شوه.
د دې کمیټې د کار د پیل کیدو په مناسبت غونډه کې چې د تخنیکي او مسلکي زده کړو ادارې د متعلمینو او محصلینو چارو ریاست لخوا ترسره شوه، د دې ادارې یو شمیر مسؤلینو او روښانزړو هم حضور درلود.
ښاغلي حاجي غلام سخي وحدت د یادې ادارې د ځانګړو زده کړو آمر، په دې پروګرام کې د خپلې وینا په ترڅ کې وویل چې د قرآن عظیم الشأن د آیتونو او حروفو د لمس کولو لپاره د روښانزړو اوږدمهاله آرمان به د دې کمیټې د کار له بشپړیدو وروسته پوره شي.
نوموړي دا هم زیاته کړه چې هڅه کوي ترڅو په بیلابیلو برخو کې د روښانزړو لپاره غوره ښوونیز فرصتونه برابر کړي. ښاغلي وحدت همدارنګه ټینګار وکړ چې د بیاکتنې کمیټه، چې د هیواد د روښانزړو متخصصینو څخه تشکیل شوې ده ، ډیر ژر به خپل کار بشپړ کړي.
په ورته وخت کې ویناوالو هم په یاد پروګرام کې د وینا پرمهال په بریل لیک د قرآن عظیم الشأن لیکلو د بیاکتنې کمیټې د کار له پیل کیدو څخه قدرداني وکړه، او زیاته یې کړه چې د هیواد په تعلیمي سکټور کې د تخنیکي او مسلکي زده کړو اداره له مهمو بنسټونو څخه ګڼل کېږي.
د یادونې وړ ده چې بریل لیک د لیکلو یو لمسي سیسټم دی چې د ړندو او روښانزړو کسانو لپاره جوړ شوی. پدې سیسټم کې، توري او سمبولونه په کاغذ باندې په برجسته بڼه چاپ شوي ترڅو د ګوتو په لمس سره ولوستل شي.
