په سمه توګه د عملي روزنو زده کړه د کار په بازار کې د دندې ترلاسه کولو مستقیمه لاره!
په کاري ساحه کې د عملي روزنې زده کړه له زده کونکو سره مرسته کوي ترڅو نوموړي وتوانېږي په مستقیم ډول د کار په بازار کې جذب شي.
په همدې اساس، د میدان وردګو ولایت اړوند چک کثیرالرشتوي انسټیټوټ د ساختماني څانګې زده کونکي د دې ولسوالۍ مرکز ته د علمي سفر په موخه لاړل.
نوموړو په دې علمي سفر کې، د ساختمان د تهداب خط ایستلو، د ساختمان د نقشو رسمولو او نقشه کشي په ګډون د مختلفو ساختماني موضوعاتو په اړه عملي روزنه ترلاسه کړه.
لارښود استاد د زده کونکو د لا ښې زده کړې لپاره، هغوی ته د ودانیو نقشه کشۍ او د تهداب د خط رسمولو په اړه مفصل توضیحات ورکړل، او د زده کوونکو پوښتنو ته یې هم ځوابونه ورکړل.
د زده کونکو په زده کړه کې د عملي زده کړو اهمیت ته په پام سره، د تخنیکي او مسلکي زده کړو ادارې رهبري تل هڅه کوي چې د تخنیکي او مسلکي زده کړو په مرکزونو کې د دې زده کړو لړۍ نوره هم پیاوړې کړي.
