د کاپیسا د تخنیکي او مسلکي زده کړو مرکزونو د فارغانو لپاره د فراغت مراسم ترسره شول
د کاپيسا ولايت د تخنيکي او مسلکي زده کړو له مرکز څخه د برښنا انجنيرۍ، ساختماني انجنيرۍ، د موټرو ترميم انجنيرۍ او کمپيوټر ساينس له څانګو څخه څه باندې ١٥٠ تنه فارغ شول.
په دغه مراسمو کې د کاپيسا ولايت مرستيال والي مولوي اسدالله سنان په ګډون د یاد ولايت سيمه ييزو مسئولينو هم برخه اخيستې وه او ويناې يې وکړې.
د دغه مراسمو په پيل کې د فارياب ولايت د تخنيکي او مسلکي زده کړو آمر مولوي شمس الرحمن سعادت د تخنيکي او مسلکي زده کړو ادارې د لاسته راوړنو، موخو او پلانونو په اړه معلومات ورکړل او له تخنيکي آمریت سره يې د دغه ولايت د سيمه ييزو ادارو د همکاريو قدرداني وکړه.
په ورته وخت کې د کاپیسا مرستیال والي د تخنیکي او مسلکي زده کړو د مرکزونو زده کوونکو ته د فراغت مبارکي وویله او ځوانان یې د افغانستان سرمایې په توګه یاد کړل.
ښاغلي مولوي اسدالله سنان دغه راز زياته کړه، هڅه کوي، چې په یاد ولايت کې د تخنيکي او مسلکي زده کړو له مرکزونو فارغانو ته د کار زمينه برابره کړي.
د دغه مراسمو نورو ويناوالو هم په هېواد کې د تخنيکي او مسلکي پوهې پر اهميت او اړتيا ټينګار وکړ.
له بلې خوا د کاپيسا ولايت سيمه ييزو مسئولينو د مراسمو په پاى کې د محصلينو له لاسته راوړنو او نوښتونو څخه ليدنه وکړه او د کاپيسا ولايت مرستيال والي له اختراع کوونکو سره د مالي همکارۍ ژمنه وکړه.
