مالي او اداري چارو مرستیال له کندز والي سره د تخنیکي او مسلکي مرکزونو د ملکیتونو په اړوند خبرې اتري وکړي
د تخنيکي او مسلکي زده کړو ادارې مالي او اداري چارو مرستيال مفتي فضل الرحمن فاضل د کندوز له والي ملا نثار احمد نصرت سره وکتل او د یاد ولايت د تخنيکي او مسلکي مرکزونو د ملکيتونو پر ستونزو يې خبرې وکړې.
ښاغلي فاضل وویل چې د کندز د تخنیکي او مسلکي زده کړو د مرکزونو ځینې ملکیتونه د نورو ادارو له خوا تصاحب شوي دي.
نوموړي د يادو املاکو په پېژندنه او تثبيت کې د کندوز له والي څخه د همکارۍ غوښتنه وکړه او ويې ويل، چې د تخنيکي او مسلکي زده کړو مرکزونه خپلو ملکيتونو ته اړتيا لري. د ښاغلي فاضل په وینا، د کندز په یو شمېر ولسوالیو کې د تخنیکي او مسلکي زده کړو مرکزونه درسي خونې نه لري.
دکندز والي ډاډ ورکړ چې په یاد ولايت کې د تخنيکي او مسلکي زده کړو د مرکزونو د شتون ستونزه به له نورو رياستونو سره په هوکړه حل کړي .
