په لوګر کې د تخنیکي زده کړو مرکزونو د زده کونکو او کارمندانو لپاره، روغتیایی خدماتو ته د لاسرسۍ زمینه برابره شوه
په لوګر ولایت کې د تخنیکي او مسلکي زده کړو ادارې مسؤلین وايي چې په یاد ولایت کې د تخنیکي او مسلکي زده کړو مرکزونو د زده کوونکو لپاره د غوره تدریسي چاپیریال برابرولو په موخه یې د «راحت صحت» روغتون سره د ګډو همکاریو هوکړه لیک لاسلیک کړی.
د لوګر ولایت د تخنیکي او مسلکي زده کړو آمریت د مسؤلینو پر بنسټ، زده کونکي، استادان او د ښوونیزو مرکزونو کارمندان کولای شي په ځانګړي تخفیف سره د درملنې لپاره یاد روغتیایی مرکز ته مراجعه وکړي.
په ورته وخت کې، د «راحت صحت» معالجوي روغتون رئیس د تخنیکي او مسلکي زده کړو ادارې سره د هوکړهلیک لاسلیک کولو پرمهال د ځوانانو لپاره د غوره ښوونیز چاپیریال رامینځته کولو لپاره د اسانتیاوو په برابرولو کې د دې ادارې د رهبرۍ هڅې وستایلې.
همدارنګه نوموړي په لوګر ولایت کې د تخنیکي او مسلکي زده کړو آمریت سره د دوامداره هراړخیزو همکاریو ډاډ هم ورکړ.
