په سرپل کې دمجاهدینو دتعلیمي سویې د تثبیت آزموینه واخیستل شوه
په سرپل ولایت کې د مجاهدینو د تعلیمي سویې د تثبیتولو آزموینه د ياد ولایت د والي مرستیال الحاج داملا محمد نادر حقجو په حضور کې واخیستل شوه.
په دې آزموینه کې شاوخوا ۵۰۰ تنو مجاهدینو برخه اخیستې وه چې د سرپل ولایت د تخنیکي آمریت د چارواکو په وینا؛ هغوی د تعلیمي سویې د تثبیت وروسته د لېسې او انستیتیوت په دورو کې د زده کړو لپاره د تخنیکي او مسلکي زده کړو په مرکزونو کې شاملیږي
الحاج داملا محمد نادر حقجو چې د دې پروګرام په افتتاحیې مراسمو کې یې خبرې کولې؛ له مجاهدينوڅخه يې وغوښتل چې د علم د حاصلولو لپاره هلې ځلې وکړي.
نوموړي د مجاهدینو د زده کړو په برخه کې د تخنیکي او مسلکي زده کړو ادارې له پاملرنې څخه د تقدیر ترڅنګ زیاته کړه، چې مجاهدین باید له دې فرصت څخه زیاته ګټه پورته کړي.
بل خوا د سرپل د تخنيکي زده کړو آمر مولوي محمد ياسين فيضي په دې آزموينه کې د شفافيت په اړه ډاډ ورکړ.
