مولوي غلام سعید احساس د خپل سفر په ترڅ کې د نورستان له مرستیال والي سره وکتل
د تخنیکي او مسلکي زده کړو ادارې د تخنیکي او مسلکي چارو مرستیال مولوي غلام سعید احساس د یوه پلاوي په مشرۍ نورستان ولایت ته سفر وکړ او د یاد ولایت له یو شمېر سیمه ییزو چارواکو سره یې وکتل.
د تخنيکي او مسلکي چارو مرستيال د یاد ولايت له مرستيال والي مولوي فيصل مختار سره په کتنه کې د تخنيکي او مسلکي زده کړو د ادارې د برنامو څخه د ملاتړ په اړه بحث او خبرې اترې وکړې.
په دغې کتنه کې ښاغلي احساس د تخنيکي او مسلکي زده کړو ادارې د موخو او برنامو په اړه معلومات ورکړل او ويې ويل چې د ماهر او مسلکي ځواک روزل د دغې ادارې له اصلي موخو څخه دي.
ښاغلي احساس د نورستان له مرستیال والي سره په لیدنه کې د مجاهدینو د روزنیزې طرحې په اړه هم خبرې وکړې او ویې ویل، چې د یادې طرحې په پلي کېدو سره به د مجاهدینو لپاره د تخنیکي او مسلکي زده کړو ترڅنګ د ادارې او مدیریت زده کړو زمینه هم برابره شي.
نوموړي همدارنګه د هغه سپورتي موټر په اړه هم يادونه وکړه چې د قطر نندارتون ته وړل شوی او ويې ويل چې دغه موټر د تخنيکي او مسلکي زده کړو ادارې د نوښت په مرکز کې جوړ شوى دى.
ښاغلي احساس همدا راز زیاته کړه چې د نوښت مرکز د تخنیکي او مسلکي زده کړو په اداره کې په هیواد کې د نوښتګرو او خلاقو ځوانانو د ملاتړ په موخه جوړ شوی دی.
د ناستې په دوام کې د نورستان مرستيال والي د تخنيکي او مسلکي زده کړو ادارې د هلو ځلو او کړنو ستاينه وکړه او په یاد ولايت کې يې د تخنيکي او مسلکي زده کړو له برنامو څخه د ملاتړ ډاډ ورکړ.
دغه راز په نورستان ولايت کې د تخنيکي او مسلکي زده کړو ادارې پلاوي هم ددغې ادارې له ښوونیزو مرکزونو څخه ليدنه وکړه .
دوی د تخنیکي او مسلکي زده کړو له مرکزونو څخه د لیدنې پر مهال د یادو مرکزونو ستونزې او وړاندیزونه واورېدل او د حل په برخه کې یې د همکارۍ ژمنه وکړه.
تر دې وړاندې هم د تخنیکي او مسلکي زده کړو ادارې د تخنیکي او مسلکي زده کړو د مرکزونو د ستونزو د هواري په موخه د هېواد ګڼو ولایتونو ته سفرونه کړي او په پام کې ده چې دغه سفرونه به ټولو ولایتونو ته وغځول شي.
