لنډ مهاله حرفوي کورسونه؛ د مهارتونو روزنه او کارموندنه
د ماهرو او متخصص انساني ځواک روزنه د هر هیواد د اقتصادي او ټولنیز پرمختګ یو له مهمو عواملو څخه دی. هر ډول اقتصادي- ټولنیزه پانګونه په تخنیکي او مسلکي زده کړو کې پلان جوړونې او پانګونې ته اړتیا لري.
اوس مهال تخنيکي او مسلکي زده کړو اداره په هېواد کې د انساني ځواک د پراختيا پروژې پلې کوي. دغه اداره هڅه کوي چې په لنډ او اوږد مهال کې د کار بازار له اړتیا سره سم د تخنیکي او مسلکي زده کړو زمینه برابره کړي.
په دې لړ کې په وروستیو میاشتو کې په مرکز او ولایتونو کې د تخنیکي او مسلکي زده کړو ادارې سلګونو کسانو ته د لنډ مهاله زده کړو کورسونه په لاره اچولې دي.
په دغه کورسونو کې د لمریزې برښنا انجینرۍ (سولر سیسټم)، موبایل او خیاطۍ مهارتونه تدریس کیږي.
دغه روزنیز کورسونه د هیوادوالو د مهارت زده کولو او د هغوی د کارموندنې په موخه په لاره اچول کیږي.
د تخنيکي او مسلکي زده کړو ادارې د حرفوي برنامو د سمون رئیس عبدالودود هوتک وايي، د دغو کورسونو ډېری فارغان له فراغت وروسته د کِسب او کار خاوندان کېږي.
هغه د لنډ مهاله کورسونو پر موثریت د ټینګار ترڅنګ زیاته کړه، چې د دغو کورسونو د څانګو د زیاتولو لپاره هڅې روانې دي.
ښاغلی هوتک زیاتوي چې اوس مهال په لنډ مهاله کورسونو کې د جذب ظرفیت د امکاناتو د نشتوالي له امله کم دی، چې په دغه برخه کې هم د حل لارې موندلو هڅې روانې دي.
