د پکتیا ولایت د تخنیکي او مسلکي زده کړو آمریت او د پوهنې ریاست ترمنځ گډو همکاریو تفاهم لیک لاسلیک شو
د پکتیا ولایت د تخنیکي او مسلکي زده کړو آمریت د یاد ولایت له پوهنې ریاست سره د ګډو همکاریو تفاهم لیک لاسلیک کړ.
دا تفاهم لیک د دواړو بنسټونو ترمنځ د متقابلې همکارۍ د پیاوړتیا، د سرچینو شریکولو، د څیړنې پراختیا، د نوښتونو ملاتړ او د تعلیمي خدماتو د ښه کولو په موخه لاسلیک شو.
د دې تفاهم لیک پر بنسټ، دواړو خواوو ژمنه وکړه چې د موجوده ظرفیتونو او اسانتیاوو په کارولو سره به یو له بل څخه ملاتړ کوي او په بیلابیلو برخو کې به ځانګړي مسؤلیتونه په غاړه اخلي. له دې جملې څخه، د تخنیکي او مسلکي زده کړو مرکزونو زده کونکي کولی شي په موقت توګه د معارف ریاست له کتابتونونو څخه ګټه پورته کړي.
دغه راز، د کارمندانو او استادانو لپاره د ظرفیت لوړولو ورکشاپونو جوړول او د دواړو ادارو د زده کوونکو له لوري د شته تجهیزاتو او امکاناتو څخه ګټه اخیستل د دې تفاهم لیک له موادو څخه دي.
په پای کې، دواړو خواوو هیله څرګنده کړه چې دا تفاهم لیک وکولای شي د دوامداره همکارۍ، علمي ودې او د مسلکي زده کړو د پراختیا لپاره لاره هواره کړي.
