د پکتيا ولايت د تخنيکي او مسلکي زده کړو آمريت او زم زم پوهنتون ترمنځ تفاهمليک لاسليک شو
د پکتيا ولايت دتخنيکي او مسلکي زده کړو آمریت په یاد ولایت کې د زم زم پوهنتون له رئيس سره دګډو همکاريو دوه کلن تفاهمليک لاسليک کړ.
دغه تفاهمليک د دواړو اړخونو ترمنځ دهمکاريو د پياوړتيا، دښوونيزو او تحصيلي چارو د بهبود او همغړیو د رامنځته کولو په موخه لاسلیک شو.
د یاد تفاهم لیک پر بنسټ به ددې ولایت د تخنیکي او مسلکي زده کړو مرکزونو فارغان د زده کړو د دوام په موخه زم زم پوهنتون ته معرفي او نوموړي به په ياد ښوونیز مرکز کې په ځانګړي تخفیف سره شامل شي.
دغهراز په تفاهم لیک کې داهم راغلي چې دواړه خواوې به د ظرفیت لوړنې په برخه کې له یو بل سره پوره همکاري کوي او د استادانو، محصلینو او اداري کارکوونکو لپاره د ظرفیت لوړونې سیمینارونه په لاره اچوي.
دا په داسې حال کې ده چې د تخنیکي او مسلکي زده کړو ادارې رهبري تل هڅه کوي ترڅو د خصوصي او حکومتي بنسټونو سره د تفاهم لیکونو په لاسلیک کولو سره د تخنیکي او مسلکي زده کړو مرکزونو زده کونکو لپاره مناسب او غوره تدریسي چاپیریال چمتو کړي.
